Stäerk
däi Mindset.

Keng eidel Motivatiounssprëch. Nëmmen éierlech, ëmsetzbar Impulser — fir Leit, déi hiren Alldag mat méi Kloerheet a manner Stress liewe wëllen.

Hypnos ass en natierlechen Zoustand, an deem s du besonnesch entspaant a gläichzäiteg ganz opmierksam bass.

Du kenns dat aus dem Alldag: Du fiers Auto an denks un eppes ganz aneres, an op eemol bass de doheem. Oder du bass sou an e Buch verdéift, datt s de d'Zäit ronderëm dech vergëss.

Genau an deem Zoustand ass däin Ënnerbewosstsinn opmierksam. An do ass dat, wat dech ëmmer erëm ausbremst: al Gewunnechten, Iwwerzeegungen iwwer dech selwer, Reaktiounen déi automatesch oflafen, ouni datt s du se bewosst wëlls.

Wat kann een domat bewierken?

Hypnos ass keng Zauberei. Mee et ass e Wee, fir un déi Plaz ze kommen, wou Verännerung wierklech ufänkt. Typesch Theme sinn:

• Stress an Ängschten — Rou ginn a Situatiounen, an deenen s du soss automatesch ugespaant bass
• Selbstvertrauen — al Iwwerzeegunge wéi „Ech packen dat net" opléisen
• Gewunnechten — Fëmmen, Prokrastinatioun, Muster déi s de zanter Joren duerchzitts
• Blockaden — Präsentatiounen, Prüfungen, Gespréicher wou s de dech blockéiert fills
• Schlof a Gedankekarussell — ofschalten, wann de Kapp net wëll ophalen
• Ziler — dech intern op dat ausriichten, wat s de erreeche wëlls

Wat Hypnos net ass

Vill Leit kennen Hypnos nëmme vun der Bün, wou ee Meeschter Hénger imitéiert. Domat huet dat hei näischt ze dinn.

• Du verléiers ni d'Kontroll. Du kriss alles mat a kanns all Moment ophalen.
• Du schléifs net. Du bass wakereg, just déif entspaant.
• Du sees näischt, wat s de net wëlls soen.

Wéini geet et lass?

Am Dezember a Januar maachen ech meng Ausbildung als Hypnotiseur. Ab Februar kann ech dech dann och op dësem Wee ënnerstëtzen — zousätzlech zu deem, wat s du elo scho bei LËTZMINDSET fënns.

Ech halen dech natierlech um Lafenden.

Ech war iwwer 40 Joer laang an enger Bubble.

Onglécklech mat mengem Liewen, onzefridde mam Job, alldeeglech Ängschten, déi mäi Liewe bestëmmt hunn. An trotzdeem hunn ech jorelaang näischt geännert.

Déi Fro, déi ech mir haut nach stellen: Wisou hunn ech esou gelieft, obwuel ech wosst, datt ech net glécklech war?

Meng Äntwert: d'Komfortzon.

Dat kléngt fir d'éischt widderspréchlech. Ech soen ech war onglécklech – a sinn awer bliwwe wou ech war? Jo. Well eng Komfortzon net heescht, datt et engem gutt geet. Et heescht just, datt ee bei deem bleift, wat ee kennt, an do, wou een sech sécher fillt.

De Wee, dee mir all geléiert hunn

Mir liewen all e Liewen, vun deem mir mengen, datt et dat richtegt ass. Mir kruten dat mat op de Wee vun den Elteren, vu Leit aus der Famill, aus der Schoul:

„Maach deng Schoul, géi schaffen, grënn eng Famill, sief e gudde Mënsch."

An mir soen eis: Jo, dat schéngt richteg ze sinn. All Mënsch mécht et jo esou.

Verstéi mech net falsch. Dee Wee ass net de falschen. Et gëtt kee Richteg a kee Falsch. Et gëtt just eng Fro, déi een sech éierlech stelle muss: Sinn ech glécklech?

Dat heescht net, datt ee muer säi Partner verléisst oder säi Job hischmäisst, well een denkt, da géif een direkt méi glécklech ginn. Esou funktionéiert dat net.

Als éischt un sech selwer schaffen

Ech hu laang gemengt, ech misst just meng Ëmstänn änneren. Oder d'Leit ronderëm mech. Mäi Liewenspartner, dee mech net versteet. Mäi Chef, dee mengt, hie wéisst alles besser. Meng Mamm, déi mer e schlecht Gewësse mécht.

Dat klappt net.

Well een aneren änneren ze wëllen heescht am Fong: Ech mengen, ech wier besser wéi hien. Ech beurteelen hien op Grond vun eppes, wat hien no menger Meenung schlecht mécht.

Dat ass ee vun de wichtegste Punkten am Mindset-Training: den aneren net ze beurteelen, mee sech ze froen, wisou hien sou ass. Vläicht weess hien et net besser. Vläicht huet hien et sou an der Kandheet bäibruecht kritt. Vläicht reagéiert hien esou wéinst den Erfarungen, déi hie gemaach huet.

An da kënnt déi Fro, déi bei mir am meeschte geännert huet:

„Wien stéiert et dann?"

D'Äntwert ass kloer: Mech!

Ass dat seng Schold? Nee. Et stéiert mech, well ech zouloossen, datt et mech stéiert. A sinn ech dann iwwerhaapt perfekt? Vläicht kënnt seng Reaktioun jo och dovun, datt ech falsch reagéieren.

Wat ech geléiert hunn

Glécklech sinn ass näischt, wat vu selwe kënnt. Et ass eng Entscheedung!

Ech hu mäi Liewen net vun engem Dag op deen anere geännert, mee mat klenge Schrëtt. Eng Erkenntnis haut, eng Gewunnecht muer, eng Entscheedung, déi sech no mengen Ziler riicht.

Dat dauert. Do brauch ee Gedold – och mat sech selwer. Mee et geet.

An du wäerts eppes gesinn: wann s du dech weiderentwéckels, entwéckelen sech ganz oft d'Leit ronderëm dech mat. Wann s du positiv denks, ännert sech deng Energie. Vill Leit ronderëm dech spieren dat – an du kriss et vun hinnen zréck.

Leider wäerts de och mierken, datt net all Leit op dengem Wee matzéie wëllen oder kënnen. Da muss du, deemno wéi, dës Persoune lassloossen. Dat gehéiert och zum Mindset: Persounen hannert sech ze loossen, bei deenen s du mierks, datt s du a hirer Géigewaart kleng bleifs.

Du wiels dech selwer.

Wisou LËTZMINDSET

Wann s du bis hei gelies hues an dech dran erëmfënns, hues du schonn en entscheedende Virdeel: Du hues erkannt, datt s du eppes un dengem Liewen an dengem Mindset ännere wëlls.

Bei LËTZMINDSET fënns du keng grouss Verspriechen, déi dech vun engem Dag op deen anere komplett änneren. Ech gleewen u kleng, kloer Schrëtt.

Stäerk däi Mindset. Du bass et wäert!